Home កីឡា លោក Simeone ថ...

លោក Simeone ថា Marseille មានចំណុចស្រដៀង Atletico ច្រើន

15

គ្រូបង្វឹក Atletico Madrid លោក Diego Simeone លើកឡើងថា Marseille មានចំណុចស្រដៀងក្រុមរបស់លោកច្រើន និងព្យាករថាវគ្គផ្ដាច់ព្រ័ត្រ Europa League នៅកីឡដ្ឋានរបស់ក្លិប Lyon ម៉ោង១៖៤៥រំលងអធ្រាត្រថ្ងៃពុធទី១៦ខែឧសភាឆ្នាំ២០១៨នេះនឹងល្អមើល។

លោក Simeone និយាយថា ៖ “យប់នេះយើងនឹងលេងវគ្គផ្ដាច់ព្រ័ត្រមួយទៀតហើយ។ អារម្មណ៍ខ្លាំងក្លានឹងពាក់ព័ន្ធក្នុងប្រកួតនេះ។ យើងបានស្រមៃដល់ឱកាសនេះ ប៉ុន្តែយើងក៏ត្រូវប្រឈមមុខនឹងវាជាមួយនឹងភាពដាក់ខ្លួននិងប្រឹងធ្វើការខ្លាំង។ យើងមានគូបដិបក្ខអស្ចារ្យមួយ។ ពួកគេពូកែឡើងប្រយុទ្ធ។ ពួកគេក៏មានក្ដីស្រមៃ។ ពួកគេមានលទ្ធផលយ៉ាងល្អប្រសើរនៅក្នុងលីគបារាំង។ ខ្ញុំគិតថាការប្រកួតយប់នេះនឹងល្អមើល គឺជាវគ្គផ្ដាច់ព្រ័ត្រដ៏ស្រស់ស្អាតមួយ។ ក្រុមយើងទាំងពីរមានស្ទីលស្រដៀងគ្នានិងចំណុចស្រដៀងគ្នាជាច្រើន”។

គ្រូជនជាតិអាហ្សង់ទីនរូបនេះនឹងមិនអាចឈរបញ្ជានៅតំបន់បច្ចេកទេសបានឡើយ ពោលគឺត្រូវអង្គុយនៅខាងលើ ដោយសារជាប់បម្រាមចំពោះឥរិយាបថរបស់ខ្លួនអំឡុងការប្រកួតជើងទី១ទល់នឹង Arsenal ក្នុងវគ្គពាក់កណ្ដាលផ្ដាច់ព្រ័ត្រ ហើយជំនួយការ German Burgos នឹងរ៉ាប់រងតួនាទីជាក់ស្ដែងជំនួស។

ដោយឡែក ប្រធានក្រុម Diego Godin និយាយថាក្រុមរបស់គេនឹងត្រូវបង្ហាញស្មារតីតស៊ូដូចគ្នាទៅនឹងកាលដែលពួកគេផ្ដួល Arsenal បើសិនចង់លើកពាន។ Godin បន្ថែមថាខ្សែប្រយុទ្ធ Antoine Griezmann នឹងអាចទុកចោលភាពសង្ស័យចំពោះអនាគតរបស់គេមួយឡែក ហើយផ្ដោតអារម្មណ៍ជួយក្រុមយកជ័យជម្នះ៕

Advertisement - Unitus 728x90